Moet ek elke dag opsom?
Tydens ons studiemetodes werkswinkels moedig ons kinders aan om behoorlike tydsbeplanning te doen. Ons leer hulle ook sekere tegnieke om hulle tyd reg te beplan. Maar in vandag se besige wêreld, hoe maak ek genoeg tyd vir huiswerk, buitemuurse aktiwiteite, opsommings en rus?
In ‘n ideale wêreld sal jy vandag by die huis kom en dit wat jy daardie dag geleer het, opsom. Jy sal ons studiemetodes tegnieke wat jy in ons studiemetodes werkswinkel geleer het, elke dag toepas en wanneer die eksamen kom, sal jy klaar en op datum wees met al jou opsommings. Maar ons lewe nie in ‘n ideale wêreld nie. So hoe moet ek sorg dat my opsommings op datum bly?
Hoekom moet ek opsom?
Opsommings is deel van jou leer proses. Dit help jou om dit wat jy in die klas leer, vas te maak in jou geheue. Dit is belangrik om reg op te som volgens jou leerstyl sodat jy die werk makliker kan onthou. Kleure en prente is ontsettend belangrik wanneer jy opsom.
Hoe kan ek opsom as ek nog nie my afbakening gekry het nie?
Jou opsommings moet klaar wees voor die eksamen of toetsreeks begin. Die dag voor die toets moet jy nie besig wees met opsommings nie. Dan moet jy net voorberei vir die vraestel. (As jy wil weet HOE om te memoriseer voor ‘n toets of eksamen, woon een van ons praktiese werkswinkels by)
Maar hoe kan ek voor die tyd opsom as ek die toetsafbakening eers ‘n week of twee voor die toetsreeks kry? Dan gaan ek mos ‘n klomp goed onnodig opsom?
Om daardie vraag te beantwoord, moet ons kyk na wat die doel van opsommings is. Opsom is deel van jou leerproses. Opsommings help jou om jou werk te verstaan en om konsepte in jou geheue vas te maak. Jy hoef nie te wag vir jou afbakening voor jy opsom nie. Ja, jy gaan dalk iets opsom waaroor jy nie toets skryf nie. Maar dit is beslis nie ‘n mors van tyd nie. Daardie opsommings help jou om die groter prentjie te verstaan. Dit gee jou insig in jou werk en vergroot jou verwysingsraamwerk. Dit is beslis nie ‘n mors van tyd nie.
Ek is baie besig in die middae na skool. Ek kan nie my opsommings op datum hou nie.
Om jou opsommings op datum te hou is ontsettend belangrik. Jy moet elke dag dit wat jy in die klas leer, kom opsom by die huis. Maar dit werk nie vir alle kinders nie. As jy baie huiswerk en buitemuurse aktiwiteite het na skool, gaan dit moeilik wees om elke dag jou werk op te som. So hoe dan nou? Moet jy jou opsommings los? Moet jy maar die dag voor die toets probeer opsom?
NEE! As jy nie in die middae tyd het vir opsommings nie, moet jy oor ‘n naweek tyd maak vir dit. Teen Sondag aand moet jou werk van die vorige week klaar opgesom wees. Kry ‘n tyd oor ‘n naweek wanneer jy nie te besig is nie en maak ‘n “date” met jou opsommings. Boek daardie tyd uit om net te fokus op jou opsommings. As jy vir jouself sê op ‘n Saterdag van 12 tot 2 is dit my opsom tyd, dan fokus jy net op jou werk gedurende daardie tyd. Wees getrou sodat jy op datum bly. Jy gaan beslis die verskil in jou punte sien (as jy reg en slim opsom natuurlik).
Opsom is belangrik
Jou opsommings is ‘n integrale deel van jou leerproses. Moenie dit afskeep nie. Bly op hoogte van jou werk en oefen jou opsom tegnieke in. Jy gaan die vrugte pluk van jou harde werk.
Moet ook nie ander se opsommings koop nie. Opsom is deel van JOU leer proses. Moenie die waarde daarvan onderskat nie.
