Die Dolfyn Leerstyl
SIT STIL!
Deur die eeue is daardie woorde al deur miljoene ouers gespreek en dit gaan nog honderde jare in die toekoms herhaal word.
Met die skole wat toe was tydens lockdown het ouers beslis agtergekom hoe moeilik dit vir sekere kinders is om stil te sit wanneer hulle skoolwerk moet doen. Die frustrasie is groot wanneer jy as ouer wil hê jou kind moet stilsit, maar hy kom net nie tot ruste nie! Hoe dan nou gemaak met skoolwerk, huiswerk en leer vir die eksamen?
Het my kind ADHD as jy nie kan stilsit nie?
Daar kan verskeie redes wees hoekom kinders kriewelrig is en nie kan stilsit en konsentreer nie. Dit is uiters belangrik om met professionele mense kontak te maak ten einde vas te stel wat die rede is en om dan die noodsaaklike stappe te neem ten einde die probleem aan te spreek.
Een van die moontlike redes hoekom jou kind dalk nie kan stilsit nie is omdat hy dalk ‘n Dolfyn leerder is. Dolfyn leerders is altyd op en af en kan nie stilsit nie. Iets moet altyd beweeg, al is dit net die pen in die hand of die been onder die tafel. Dit is natuurlik ‘n reuse frustrasie vir ouers wat net wil hê dat boetie of sussie moet stilsit sodat die werk gedoen kan word.
Daar is voortdurend konflik tussen die dolfyn leerder en ouers wanneer leerwerk gedoen word. Ouers raak woedend oor die dolfyn moet rondbeweeg terwyl die dolfyn nie kan verstaan wat die probleem is nie. Hoekom moet hy stilsit?
Die vraag is KAN die dolfyn werklik stilsit? En is dit goed vir hom om stil te sit? Is daar ‘n rede hoekom hy so baie beweeg?
Die feit dat die dolfyn leerder konstant beweeg beteken nie dat hy ‘n onvermoë het om te konsentreer nie, maar eerder dat hy ‘n begeerte het om sy liggaam te gebruik om die wêreld om hom ten volle te ervaar.
Dolfyn leerders word in baie gevalle gesien as stout of ongehoorsaam. Sommige volwassenes kan hulle selfs as irriterend beskou. Maar dansers, gimnaste, atlete, rugby- en netbal spelers asook ingenieurs en argitekte is almal voorbeelde van die dolfyn leerder wat uitblink in areas waar beweging tydens leer toegepas word.
Eienskappe van die dolfyn leerder
- Leer die beste deur beweging
- Fokus op die geheel eerder as op detail
- Leer baie suksesvol met 3-D materiaal
- Moet beweeg wanneer hulle nuwe inligting prosesseer, maar fokus op beweging van die liggaam, eerder as op objekte wat hulle aandag kan aftrek.
- Wanneer hulle leer moet hulle “hands-on” aktiwiteite doen
- Hulle moet eerder die werk DOEN as wat hulle net daarna luister.
Leertegnieke vir die Dolfyn leerder
1. Spandeer genoeg tyd buite. Dit help vir konsentrasie en fokus.
2. Laat hulle beweeg. Hulle sal baie meer effektief leer as hulle kan staan by hulle tafel, hulle voete beweeg of heen en weer kan loop.
3. Moenie leer en huiswerk sessies te lank maak nie. Vat gereeld breuke en gaan doen iets aktiefs buite. ‘n Trampoline is ‘n baie goeie idee
4. Wanneer hulle stappe moet onthou, laat hulle die stappe in hulle verbeelding uitbeeld.
5. Die dolfyn se aandag volg sy hande. Moedig hulle aan om notas te maak, prentjies, grafieke of diagramme te maak van dit wat hulle hoor.
6. Moenie vir hulle ‘n wiskunde som in geheel verduidelik nie, maar laat hulle stap vir stap die som doen terwyl jy elke stap verduidelik.
7. Flitskaarte werk uitstekend vir die dolfyn leerder.
