Menige kind het al by ons studiemetodes werkswinkels genoem dat maak nie saak hoe hard hulle leer nie, hulle steeds “blank” slaan tydens die toets. Asof hulle niks kan onthou nie, al het hulle ure lank geleer. Hoekom gebeur dit?
Hoe werk memorisering?
Die mens se brein is ‘n ongelooflike komplekse orgaan. Ons gebruik memorisering of geheue om inligting te kry, te stoor en later weer op te roep.
Om inligting wat ons gememoriseer het, weer op te roep, moet dit in ons geheue gekodeer word. Soos wat mens inligting in ‘n rekenaar intik en die “save” knoppie druk. Daar is baie faktore wat ons geheue kan beinvloed. Soms is iets op die punt van ons tong, maar ons kan dit nie onthou nie. Maar na ‘n rukkie het die brein deur al die paadjies gehardloop en kan ons skielik onthou. Maar met ons skoolwerk wil ons nie sukkel om iets te onthou nie. Daarom gebruik ons sekere memoriseringstegnieke om ons te help om die inligting reg te stoor en op te roep.
Herhaling
Een van die lekkerste dinge van om ‘n konsert by te woon is wanneer die hele gehoor saam met die sanger uit volle bors sing. Mens kry sommer hoendervleis. Maar die vraag is hoe kan ons die woorde so maklik onthou? Soms hoor ons ‘n liedjie wat al 5 jaar oud is, maar ons kan steeds saamsing. Alles gaan oor herhaling. Wanneer ons iets genoeg oor en oor herhaal, gaan ons dit baie makliker kan herroep. Wanneer jy leer vir ‘n toets is dit belangrik om hardop te praat en die werk oor en oor te herhaal. Wanneer jy die werk kan onthou sonder om een keer op jou papier te kyk, moet jy dit nog ‘n hele paar keer herhaal om dit in jou geheue vas te lê.
Gebruik jou sintuie
Wanneer jy leer vir ‘n toets, gebruik soveel as moontlik van jou sintuie. Leer hardop dat jy jouself kan HOOR, maak kleurvolle opsommings dat jy jou werk kan SIEN, gebruik flitskaarte of skryf op ‘n witbord sodat jy die werk kan VOEL, kou ‘n spesifieke geur kougom sodat jou SMAAK sintuig kan werk en spuit ‘n sekere parfuum sodat jou REUK sintuig kan werk. As jy ‘n sekere parfuum gespuit het toe jy SW geleer het, maak seker dat jy daardie selfde parfuum aanspuit wanneer jy SW skryf. Jy sal verbaas wees hoe jou sintuie jou gaan help om beter te onthou.
Flitskaarte
Flitskaarte is ‘n lekker manier om jou werk te herhaal sodat dit in jou brein gekodeer word. Maak kleurvolle flitskaarte en leer die kaarte uit jou kop uit. Loop rond en herhaal die flitskaarte hardop. Speel verskillende speletjies met jou flitskaarte.
Akronieme en akroniem sinne
Akronieme en akroniem sinne is ‘n goeie manier om ‘n lys van dinge te onthou. Dit kan ook gebruik word om die sub opskrifte van ‘n langvraag te onthou. In graad 1 het ons die vokale geleer met ‘n akroniem sin – arme ek is oupa uil – asook die planete (toe Pluto nog ‘n planeet was) – Meneer van as my jas sal u nie pas. Vir akronieme kan ons die eerste letters van die lys wat ons moet onthou vat en ‘n nonsenswoord maak met daardie letters. Vir die vokale kan mens byvoorbeeld die nonsenswoord aeiou maak. Dis egter baie belangrik om die akronieme asook akroniem sinne genoeg te herhaal. Anders gaan jy nie onthou waarvoor dit staan nie.
Gebruik jou omgewing
Om ‘n lys van dinge te onthou kan jy ook jou bekende omgewing gebruik as memoriseringstegniek. Kom ons sê jy moet 5 items onthou: ‘n rekenaar, ‘n selfoon, ‘n bruin baadjie, ‘n paar tekkies en ‘n lemoen. Gebruik jou bekende omgewing en plaas elkeen van hierdie items in jou omgewing. Vat jou huis byvoorbeeld. Jy stap in jou huis in en op die tafel sit jou pa en werk op die rekenaar. Jy loop kombuis toe waar ma besig is om op haar foon te praat. Sy het ‘n bruin baadjie aan. Daarna stap jy na jou broer se kamer en val oor sy tekkies. Jy baklei met hom en hy gooi jou met ‘n lemoenskil. As jy dit genoeg herhaal gaan jy die items baie maklik kan oproep tydens die toets.
Die 2 belangrikste dinge wat moet gebeur tydens memorisering is herhaling en verstaan. Dis moeilik om iets te onthou as jy dit nie verstaan nie. As jy onseker is oor iets, vra jou onderwyser of jou ouers, Google dit of kyk ‘n video op Youtube. As jy wil weet of jy rerig iets verstaan, moet jy dit verduidelik aan iemand anders. As hulle verstaan wat jy verduidelik, beteken dit jy verstaan ook. So onthou hierdie 2 aspekte tydens memorising: herhaal en verstaan.
Gebruik die verskillende memoriseringstegnieke en jy sal verbaas staan oor hoe goed jy jou werk onthou.
