Wenke om spelwoorde te leer

Hoekom is spelling belangrik?

Om reg te spel behels meer as om net jou graad 4 speltoetse te slaag. Korrekte spelling is belangrik deur jou hele lewe. Wanneer jy aansoek doen vir ‘n werk gaan jy moeilik aangestel word as jou CV vol spelfoute is. Uitnodigings na troues of partytjies moet reg gespel word om nie eers te praat van spelling op sosiale media nie. Daar is geen leestekens in sig nie en dit vat mens ‘n ruk om te probeer raai wat sommige woorde beteken.

Wat is belangrik wanneer my kind spelwoorde leer?

Wanneer spelwoorde geleer word is daar sekere dinge wat baie belangrik is:

Hoe KLINK die woord?

Hoe LYK die woord?

Wat BETEKEN die woord?

Om reg te speel behels dus baie meer as om net ‘n lys van woorde te leer. Nie net moet daar geleer word hoe om die woord te spel nie, maar daar moet ook geleer word wat die woord beteken en hoe die woord in ‘n sin gebruik word. Soos met enige skoolwerk is VERSTAAN waar die sukses lê. Om soos ‘n papegaai te leer maar nie te verstaan nie, is ‘n mors van tyd. ‘n Woord kan slegs verstaan word binne konteks. Lees vir jou kind, lees saam met jou kind, vertel vir hom stories en verduidelik vir hom hoe dinge werk. Moedig hom aan om te lees oor dinge wat hom interesseer.

Prettige maniere om spelwoorde te leer

Flitskaarte

Flitskaarte kan groot pret wees. In plaas daarvan om net die kaartjies te wys en spel, kan mens lekker speletjies speel.

Spelwoord memorisering:

Maak ‘n dubbele stel van die spelwoorde en draai die kaartjies om. Laat jou kind die kaartjies twee op ‘n slag omdraai en soek vir die kaartjies met dieselfde woord op.

4 op-‘n-slag speletjie:

In slegs 4 stappe kan jou kind oefen om te lees, spel en skryf. Maak flitskaarte van die woorde en draai dit om. Laat jou kind kyk na die woord, dit hardop sê, die letters opsê en dan die kaartjie weer onderstebo neersit. Wanneer hy die kaartjie neersit moet hy die woord op ‘n papier skryf.

Vertel vir my ‘n storie:

Plaas die flitskaarte onderstebo op die tafel en maak beurte om ‘n woord op te tel. Laat hy die woord hardop lees en dan ‘n sin maak of ‘n kort storie vertel met daardie woord. So leer hy die woorde se betekenis.

Spelwoord wedren:

Elke speler kry ‘n pen en papier. Een persoon (gewoonlik die ouer) sê ‘n woord en elke speler moet daardie woord so gou as moontlik neerskryf. Die persoon wat die woord eerste reg gespel het, is die wenner.

Daar is soveel prettige maniere om spelwoorde te leer. Speltoetse hoef nie ‘n pyn te wees nie. Kontak ons gerus vir nog wenke of indien julle ‘n studiemetodes werkswinkel wil bywoon.